Ligue Wallonne Bruxelles

LES CLOQUES D’MIN CLOQUI Tout la-bôs, in hâ, - Par lés tras d’leu fernette, - Lés cloques d’min cloqui - I-ont pôs b’son d’leunettes - Pour tout orluqui - Cin qui s’passe in-bas… - I connot’te tous lés gins - Qui vont èt vènn’te dins l’pat‘lin. - Min Dît ! qu’i n’d’ont d’jô vu - Depus qu’i sont in hâ pindus ! - Leu cœur d’airain, i-é pôs frôd, au contraire, - I buque aveuc nou bonheurs, nou misères. - I-asseust’te à tous lés évén’mints - D’la vie dés gins, - Quanqu’i vint au monte in marale, - Lés cloques i sont tout in foufale. - I déchindrot’te volontî - Pour vîr eul nouvé batiji. - Alfôs, i-ont ausseu du chagrin, - Ch’é quanqu’i-ô in interr’mint. - Lés cloques i brait’te dins leu cloqui… - Ch’é leu manîre d’nou soulaji. - Quanqu’i-ô in mariache, - Lés cloques, adan, i sont bénaches. - I font tél’mint du brût dins l’tour - Qu’lés coulons i sont béteu sourds ! - I s’involt’te tertous’ in criant : - « In dirôt qu’ch’é l’révolutian ! » - Ah ! vous êtes, lés cloques d’min cloqui, - Te prinds ène grantepart dins nou vie. - Qu’in sôt heureux ou malheureux - Te nous laiche jamé tout seu… - Et ch’é lassan… Che s’ra toudi - Tant qu’i-aura dés cloques d’ins nou cloqui ! - G. Pittellioen