Ligue Wallonne Bruxelles

Awè ! Dji so-st-ine payizante. Et fîre di l’èsse èco ! Oh ! Dja bin sayî dè d’moni è l’vèye, qu’ djî ovréve, là qu’ djî ovrévre. Mins, I m’mäquéve ine saqwè,nin tant lès-äbes ou lès tchamps, nèni, pus vite ine manîre dè viker : k’nohe sès vwèzins, èlzî poleûr èpronter deûs-oûs èt ‘lzî rapwèrter on banstê d’rodjès gruzales ; si dispièrter avou lès mävîs èt lès tchampin.nesPortant li campagne candje, come tot-à-fêt. Lès mohones boutèt come dès tchampions al fin dè meûs d’awous’, èt bin vite vos n’veûrez pus lès wêdes dè long dès p’titès vôyes –vos n’lès veûrez torade pus qu’dè cîr !Nin lès pônes dè baguer, si c’èst po v’ni r’fé l’vèye al campagne ! Dji crèh qwand dj’ènn’ ètind dès cis qui mädihèt l’ coq qu’èlzès dispiète trop timpe, li cinsî qu’oûveûre trop tärd, li pufkène di l’ansène – c’èst portant pus hêtî qui l’ mazout ! Va co bin qu’il-ont v’nou ca, sinszèls, cès pôves payizans-là vik’rît co sûrmint todi po-drî leûs-ansinîs. Awè, n’a nou mä qu’ dès djins sûtîs èlzî v’nèsse diner dès bonès-îdèyes ! S’on n’èlzî aveût nin hèré dès pouces è l’orèye, èt ‘lzî fé creûre qu’i vik’tît so blancs peûs, mutwèt n’ârîs-gn’mäy magriî dès polèts al dioxine ou vèyou dès vatches danser l’cakewale ! Et n’s-ärîs co todi dès pomes qu’ont l’gos’ di pomes, èt d’timps-in-timps, in-oû à deûs moyous qui lûrît so l’achète come dès p’tits solos.Dji crèh dè veûy qu’on n’si djäse pus, qu’on n’ si k’nohe pus. Dji crèh qwand l’ome qui d’mane treûs mohones pus lon, passe è s’vwètûre, reûd come ine bèye, sins min.me on sène dèl tièsse ou dè p’tit deût, èt r’mousse ä pus-abèye po-drî sès hôtès häyes di sapins, avou’ne foû grande bärîre qu’on r’ssére tot dreût « à l’élèctrique ».Quî èst-ç’ qu’a ‘ne grosse tièsse è trin d’vins ?Dji m’va sûr fé loukî è cwèsse, m’alez-v’ dîre ? Nèni, n’a nou rissel I n’polèt mä dè lére li bilèt walon !Maggy FRISEEExtrait de « Come ine saqwè è l’êr »Edition du Royal Caveau Liégeois, 2003