Ligue Wallonne Bruxelles

Les temps cangent, el patois resse !Dins l’temps on r’prennoit les infans quand is parliont montois èyè i n’a nié co si lonmint, qu’on intindoit dire qué no patois « voloit au ras des pâquerettes ».In tout cas, mi j’pinse qué pindant l’année 2007 qui s’in va, on a prouvé à tous ces imblavés-là qué nos dialectes, margrés qu’on l’z’appele des langues mortes, sont co bé vivants…i fauroit être macaveûque pour nié l’arcounnoite.Es ramint’vez… rié qu’à Mons : Quate cabarets Wallons pleins d’anciennes cansons mais avec branmint d’nouviautés èyè cin public dé pus in pus inragé. Ein spectaque « Beatles et patois » qu’a rimpli l’téiatte èyè l’sortie du CD « Biloutlesmania » (17 cansons).Et deuxième concours dé littérature picarde… El trint’ quatième messe in montois à les Ste Vaudru èyè j’in roublie certainémint.Mais el cérise déssus l’gatiau…ein mot d’no patois : arsouille (p. 14 du dictionnaire montois) qui fait enn’ intrée triomphale dins l’Larousse 2008 !Comme disoit Marcel Gillis : « Attrapez ça à vos gambe ». Tintion, i n’a nié qu’dins no p’tit trô d’ville , qu’on pinse ainsi… Tenez, Monsieur Joseph Bodson, président d’l’Association Royale des Ecrivains de Wallonie (AREW) dins s’n’avertance dé l’revue Reflets n° 11 sous l’tite : « Ce qui nous réunit est plus important que ce qui nous sépare » i récrit (jé l’cite) : « Etre Wallon, c’est avoir le cœur ouvert et la main tendue, pour que Bruxelles et la Wallonie restent ce qu’ils n’ont jamais cessé d’être, une terre d’accueil et de liberté. Ceux qui nous aident, d’où qu’ils viennent, ceux-là sont de vrais Wallons ».Dins l’contexte actuel ça donne à réfléchi.S’waitons qu’nos infants in prennent conscieince !Airelle (R.L.)